Mas'alolin Azumi Na Biyu

Tambaya: idan mutum yayi buda baki sannan sai jirgi ya tashi tashi, sai yaga rana bata gama fadiwa ba, yaya hukuncin azuminsa?
Amsa: Wanda bayan yayi bude baki abisa lokacin da akeyi, sai kuma jirgi ya tashi dashi sai yaga rana, to wannan babu komai akansa azuminsa tayi kuma babu wani kame baki dazai sakeyi. Wannan itace fatawar Manyan Maluma: Ibn Uthaimeen, Ibn Baaz, Abdurrazaq Al-Afifi.
Tambaya: Shin mace zata iya shan maganin da zai dakatar mata da jinin Al’ada domin yin azumin ramadana cikakke?
Amsa: Babu laifi mace tayi amfani da wani magani domin ya jinkirta mata Al’ada zuwa har ta kammala Azumin Ramadan Amma sai in an Tabbatar da cewa : Wannan Magani baya cutarwa” inhar ya zamto yana cutarwa toh haramunne yin amfani dashi, Wannan shine Mazhabar Hanabila, Kuma Sheikh Ibn Baaz Yana da ra’ayi haka. Sai dai wasu maluma suna ganin Rashin yin amfani da wani magani don jinkirta haila yafi, sabida Mace ta tsaya a Dabi’an da Allah yayi ta akai shi yafi.
Tambaya: Meye hukuncin daukan jini domin yin Gwaji a Cikin watan Ramadan.
Amsa: Babu laifi mutum yaje a dauki jininsa domin yin gwaji acikin watan Ramadana. Domin bashi da wani tasiri kan azumi. Wannan shine fatawar sheikh Ibn Baaz Da Uthaimeen.
Tambaya: Shin yin Allura yana Karya Azumi?
Amsa: yin Allura baya karya azumi, sai dai in ya zamto wannan allura tana zama maimakon abinci. Amma allurar da akeyinta dun magani wannan babu laifi ayi amfani da ita. Wannan shine abinda Majma’ul Fiqhil Islami suka tafi akai, Haka Nan Sheikh Ibn Baaz Da Uthaimeen.


Reference: a duba littafin
تلاثون مسألة فقهية معاصرة عن الصوم.(إعداد قسم العلمي بمؤسسة الدرر السنية)

Mas'alolin Azumi Na Daya

Tambaya: An tambayi Sheikh ibn uthaimeen: Hukuncin wanda yake bacci baki dayan Rana a watan Ramadan, Meye hukuncin azuminsa?
Amsa: Wannan mas’alar ta kunshi yanayi biyu:
1. Ya zamto cewa mutum yana baccin ne baki dayan rana kuma baya tashi sallah akan lokacinta, toh wannan mutumi mai laifi ne, ta yadda baya tashiwa yayi ibada akan lokacinta,
2. Ya zamto yana tashiwa yayi sallah akan lokacinta, toh wannan Bashi da Laifi, sai dai yana asarar alkhairi masu yawa, domin ya dace ace mai Azumi ya zamto ya shagaltar da lokacinsa baki daya wurin Sallah da zikiri da karatun Alkur’ani da sauran ayyukan Ibada.
Tambaya: An Tambayi Sheikh ibn uthaimeen: Meye hukuncin karya Azumin Ramadan ba tare da uzuri ba?
Amsa: karya Azumin Ramadan ba tare da uzuri ba babban laifi ne, kuma wanda yayi wannan aiki ya zama fasiqi, ya wajaba akansa ya tuba sannan kuma Ramako ya kamashi. Amma in yazamto cewa ana azumin Ramadana sai mutum yaki daukan Azumi da gangan, toh wannan babban laifi ne shima, kuma Mai wannan laifi fasiqi ne dole ya tuba zuwa ga Allah, amma Ramako baya kansa abisa zance mafi inganci, domin wannan ramako bazata amfanar dashi ba, domin baza’a amsa masa ba, domin Ka’ida shine: “Duk wata ibada da take da kayyadadden lokaci, idan aka jinkirta ta daga kan lokacinta, ba tare da wani uzuri ba to ba’a karbanta”. Domin Manzon Allah(Sallallahu Alaihi wasallam) Yace: “Duk wanda yayi aiki wanda babu umarninmu aciki to an mayar masa”
Kaga wanda yaki yin azumin Ramadana alokacinta yayi awani lokaci daban wanda babu umarnin Allah ko na Manzonsa na cewa ayi wannan azumi acikinta to yayi abinda ba’a umarceshi dashi ba.
Kamar yadda bazai yiwu mutum ya fara azumi ba kafin watan Ramadan, to haka nan bazai yiwu ya jinkirta ta ba tare da wani dalili ba.


Reference: A duba littafin
الصيام مجموعة أسئلة في أحكامها(للشيخ محمد بن صالح العثيمين).

Mas'alolin Azumi(2) meye hukuncin wanda yaci abinci bayan anyi kiran sallah ta biyu abisa rashin sani? wasu abubuwa ne annabi yake bude baki dasu?

1)Wace abinci ce tafi falala mutum ya Bude baki dashi?
Amsa=anfison Mutum ya bude bakinsa da ‘ya’yan itace masu ruwa, inbai samu ba sai dabino, inbai samu ba sai yasha ruwa, dalilin haka kuwa shine hadisin Aisha(radiyallahu anha) tace ‘Manzon Allah ya kasance yana bude baki da ‘ya’yan itace masu ruwa, inbai samu ba sai yayi amfani da dabinai, idan bai samu ba, sai yayi amfani da ruwa iya gwargwado, idan ruwan bata isan masa ba sai yayi amfani da kowai irin abinci halal idan kuma bai samu komai ba sai yayi niyyan bude baki kawai.
2)Nine Naci abinci ina mai zaton cewa alfijir bata keto ba, bayan na kammala sai naji ana tada sallan alfijir, shin dole sai na rama wannan azumi?
Amsa= a wannan mas’ala akwai tsabani acikinta, malaman fiqhu ta hanabila suna cewa: idan mutum yaci abinci yana zaton dare ne, kuma ashe alfijir ta keto toh dole sai ya rama.
Amma wasu maluma suna ga cewa ba sai ya rama ba, Kaman sheikhul islam ibn taimiyyah, suna cewa babu wata ramako akansa domin yaci abincin ne abisa tabbacin cewa lokacin cin abinci halal ne, bada gangan yayi ba, kaga anan za’a iya masa uzuri fiye da mai mantuwa.
Sai dai sun gargadi mai azumi cewa ya rinka kula sosai da azuminsa, kuma bazai rama azumin bane inhar abincin da yacin ba yaci bane kan koshi da yayi, inhar yaci abincin ne kan koshi da yayi tun kafin ketowan alfijir toh zai rama azumin… Wallahu A’alam..
A saurari ta uku. Wassalaam.

Mas'alolin Azumi(1)Meye Ma'anar Azumi A Lugga Da Shari'a? Meye Hukuncin Azumin Watan Ramadan? Falalar Azumi.

Mas’alolin Azumi(1)Meye Ma’anar Azumi A Lugga Da Shari’a? Meye Hukuncin Azumin Watan Ramadan? Falalar Azumi.
Bismillahirrahmanirraheem.
Yabo da Godiya sun Tabbata ga Allah madaukakin sarki, muna neman tsarinsa da kuma gafararsa, Allah nake roko ya bani daman Fadin daidai,
Kaman yadda kuka sani ne zamu fara magana kan abinda ya shafi azumi insha’Allah….
Da farko menene azumi? A Lugga da kuma shari’a?
Azumi a Lugga= shine kamewa, ya game kamewa ga barin cin abinci ne ko kuma ga barin Magana, Da sauransu. Kamar Yadda Allah yace a ayah ta 26 cikin surat maryam.
ﻓﺈﻣﺎ ﺗﺮﻳﻦ ﻣﻦ
ﺍﻟﺒﺸﺮ ﺃﺣﺪﺍ ﻓﻘﻮﻟﻲ ﺇﻧﻲ ﻧﺬﺭﺕ ﻟﻠﺮﺣﻤﻦ ﺻﻮﻣﺎ
ﻓﻠﻦ ﺃﻛﻠﻢ ﺍﻟﻴﻮﻡ ﺇﻧﺴﻴﺎ
To, idan
kin ga wani aya daga mutãne,
sai ki ce, ´Lalle nĩ, na yi
alwãshin azumi dõmin Mai
rahama sabõda haka bã zan yi
wa wani mutum magana ba.
Ma’anar Azumi a shari’ah=shine Kame Baki ga barin Duk abinda zai keta makoshi na abinci ko abinsha, daga bullowan alfijir ta biyu, zuwa faduwan rana, da niyyar bauta wa Allah. Akwai abubuwa da dama masu karya azumi zanyi bayaaninsu nan Gaba,
Meye Hukuncin Azumin Watan Ramadan?
Amsa= Hukuncin Azumin Ramadan Wajibi ne akan duk wani baligi mai iko, kuma duka musulmai sunyi imani da haka, duk wadda yayi inkarin haka toh ya kafirta, fiqhussunnah(1/366).
Allah(subhanahu wata’ala) yana fada cikin surat bakara ayah ta 183
ﻳﺎ ﺃﻳﻬﺎ ﺍﻟﺬﻳﻦ ﺁﻣﻨﻮﺍ ﻛﺘﺐ ﻋﻠﻴﻜﻢ ﺍﻟﺼﻴﺎﻡ ﻛﻤﺎ ﻛﺘﺐ
ﻋﻠﻰ ﺍﻟﺬﻳﻦ ﻣﻦ ﻗﺒﻠﻜﻢ ﻟﻌﻠﻜﻢ ﺗﺘﻘﻮﻥ.
Yã ku waɗanda suka yi ĩmãni!
An wajabta(1) azumi a kanku
kamar yadda aka wajabta shi a
kan waɗanda suke daga
gabãninku, tsammãninku, zã ku
yi taƙawa.
Sannan kuma da ayah ta 185
ﺷﻬﺮ ﺭﻣﻀﺎﻥ ﺍﻟﺬﻱ ﺃﻧﺰﻝ ﻓﻴﻪ ﺍﻟﻘﺮﺁﻥ ﻫﺪﻯ
ﻟﻠﻨﺎﺱ ﻭﺑﻴﻨﺎﺕ ﻣﻦ ﺍﻟﻬﺪﻯ ﻭﺍﻟﻔﺮﻗﺎﻥ ﻓﻤﻦ ﺷﻬﺪ
ﻣﻨﻜﻢ ﺍﻟﺸﻬﺮ ﻓﻠﻴﺼﻤﻪ ﻭﻣﻦ ﻛﺎﻥ ﻣﺮﻳﻀﺎ ﺃﻭ ﻋﻠﻰ
ﺳﻔﺮ ﻓﻌﺪﺓ ﻣﻦ ﺃﻳﺎﻡ ﺃﺧﺮ ﻳﺮﻳﺪ ﺍﻟﻠﻪ ﺑﻜﻢ ﺍﻟﻴﺴﺮ
ﻭﻟﺎ ﻳﺮﻳﺪ ﺑﻜﻢ ﺍﻟﻌﺴﺮ ﻭﻟﺘﻜﻤﻠﻮﺍ ﺍﻟﻌﺪﺓ ﻭﻟﺘﻜﺒﺮﻭﺍ
ﺍﻟﻠﻪ ﻋﻠﻰ ﻣﺎ ﻫﺪﺍﻛﻢ ﻭﻟﻌﻠﻜﻢ ﺗﺸﻜﺮﻭﻥ.
Watan Ramalãna ne wanda aka
saukar da Alƙur´ãni a cikinsa
yana shiriya ga mutãne da
hujjõji bayyanannu daga
shiriya da rarrabħwa. To, wanda
ya halarta daga gare ku a
watan, sai ya azumce shi, kuma
wanda ya kasance majinyaci ko
kuwa a kan tafiya, sai ya biya
adadi daga wasu kwanuka na
dabam. Allah Yana nufin sauƙi
gare ku, kuma ba Ya nufin
tsanani gare ku, kuma dõmin ku
cika adadin, kuma dõmin ku
girmama Allah a kan Yã shiryar
da ku, kuma tsammãninku, zã
ku gõde.
Cewa da Allah yayi acikin ayah ta 185 (Ya Azumceshi) wannan umarni ne, kuma umarni na wajibi,
Sannan Ankarbo hadisi daga ibn umar(radiyallahu anhu) yace, manzon Allah(sallallahu alaihi wasallam) yace: ‘An Gina Musulunci kan abu biyar,
1.Shaidawa babu abin bautawa da gaskiya sai Allah,Muhammadu Manzon Allah ne,
2.Tsaida Sallah,
3.Bada zakkah,
4.Hajji,
5.Azumin wata ramadan.
Falalar azumin watan ramadan= Azumin watan ramadan yana da falala sosai, ankarbo hadisi daga abu huraira(radiyallahu anhu) yace: manzon Allah(sallallahu alaihi wasallam) yace:’duk wadda yayi azumin watan ramadana yana mai imani da kuma Neman lada awurin Allah anyafe masa duk zunubansa da suka gabata,
Bukhari(4/115/1901).
Ankarbo wata hadisin daga Sahal Ibn sa’ad yace, Manzon Allah(sallallahu alaihi wasallam) yace: ‘A aljannah akwai wata kofa da ake ce mata rayyan, masu azumi zasu shiga aljannah daga wannan kofan, babu wani wadda zai shiga ta wannan kofan saisu, za’ace inaa masu azumi? Sai su taso,babu mai shiga saisu, idan suka gama shiga sai a kulle kofan, babu wadda kuma zai sake shigha daga ta wurin.
Sunan nisa’I(4/167)…
Zamuci Gaba Insha’Allah. Wabillahittaufeeq.